Im 2020 isch so einiges schiefgloffe uf dere ganze Wält. Trotz auem hei mer üses Jubla-Johr normal chönne starte. Im Januar hei d'Grustu's agfange und d'Chinder und die Leitende hei sech jede Donnsti zwüsche 18.30 und 20.00 troffe und Spili gspüut, Rätsu glöst oder s'Dorf unsicher gmacht. Mit der Ziit si de au es paar nöi Chinder derzuecho, wo d'Jubla hei wöue cho entdecke.

Im März hei mer die ersti Papiersammlig und s'erste 15ner-Träffe no ganz normal chönne dürefüehre. Nach dere Sammlig isch de aber das Ganze schnäu umgschlage und au d'Jubla hett müesse Massnahme ergriife. Wägedäm isch dr Brunch de au abgseit worde. Das feine z'Morge, wo normalerwiis vo üs isch organisiert worde, hetts leider ni gä.

Wiiter si de uf d'Empfählig vo Jubla Schwiiz  bis im Juni aui Aläss abgseit worde. Das hett aui, d'Chinder und au die Leitende truurig und au chli nochdänklech gstimmt.

Trotzauem hei mer üch immer uf der Homepage, uf Facebook und uf üsere Instagramsiite mit Spili und Bastusache versuecht e chli Jubla heiz'bringe. 

Grustus

Ab em 6. Juni hett d'Jubla wieder dörfe Aläss durefüehre. So hei d'Donnstigruppestunden voller Fröid wieder chönne starte. Natürlech hei mer ab denn immer es Schutzkonzept für üsi Zämekünft müesse ha und das entsprächend so dürefüehre. Das hett üs aber ni drvo abghalte üse Betrieb wieder ufz'näh.

Scho am 20. Juni hei mer üs troffe und mit aune Jublachinder üsi ersti und leider au letschti Samstigruppestund vom 2020 gha. Mir hei e Schatzsuechi dür Wäuscherohr vor üs gha, wo mer a verschiedneste Orte i üsem Dorf si verbiicho. Drzue hei mer au lustigi Spiili gmacht. Am Schluss hei mer de sogar dr Schatz gfunge und aui hei es Schatz-Schöggeli mit hei becho.

Teamanlass der Leitenden

Zwöi Leiter (Danke Mike und Fridi) hei sech im Juni dra gmacht, e Alass für aui Leitende (Alt-Leitendi und Nöi-Leitendi) z'organisiere. Das isch natürlech au wichtig für üses Team. Nachere Wanderig dür Wäuscherohr und Umgäbig hei mer de dr Obe bimene gmüetleche Ässe im Chrüz lo usklinge.

Papsam

Ändi Juni hei mer de au üsi 2. Papiersammlig chönne mache. Au dasmau isch vüu Papier und Karton gsammlet worde. Das isch für aui Bewohnerinne und Bewohner sehr agnähm, wenn das deheime abgolt wird und somit korräkt entsorgt wird.

Im Juli isch wie immer die grossi Jubla-Pause cho.

Mir si aber voller Vorfröid i August, da denn üses jährleche Zäutweekend hett chönne stattfinde. Das isch in Zämearbeit mit em Feriepass immer au es chliises Highlight vom Johr. D'Chinder bechöme e chliine Iiblick is s'Lagerläbe über die 2 Täg. Es wird dusse Übernachtet, Zäut ufgstellt und uf em Füür kochet. Das macht aune immer vüu Spass. Natürlech gitz am Obe au immer es cools Nacht-GLS-Spiili, wo aui chöi Vougas gä. Das Johr hett das ganze Weekend ungerem Motto: "Wikinger" stattgfunde und aui Chinder wie au Leitende hei sech entsprächend verchleidet. Mega cool isch au üses Wikingerschiff gsi, wo d'Chinder hei dri chönne go spiile.

Dr Septämber het mit em Jublatag am 12.09.2020 agfange. Mir hei e tolle und lustige Tag zäme gha und hei verschiednigi Spiili gspilt und hei au es feins Ässe dörfe überem Füürli choche. Aui hei sech säuber es Schlangebroot und e Cervelat dörfe bröötle. Zum Dessert hets de au super süessi und feini Schoggibanane gä. 

Im Novämber hei mer üse traditionell Lagerrückblick müesse umgstaute und dir heit jede Tag e Rückblick uf üsne Social Media Kanäl chönne mitluege. Nach dere Wuche heit der de aui au no e CD becho mit aune Bilder druffe vom Herbstlager in Rona. 

Normalerwiis döi mer am Larübli au üsi Leitende verabschiede, wo im nöchste Johr wärde ufhöre leite. D'Nöileiter wärde wiederum natürli au a däm Obe offiziell im Leitigsteam ufgno. Leider isch das im 2020 e chli ungergange. Dodrmit möchte mer aber dennoch dä Leiter und die Leiterin, wo das betrifft do no ehre. 

Im Dezämber hei mer üs de e Jubla-Adväntskaländer usdänkt, wo dir jede Tag e Lieblingsmomänt vomene Leiter oder ere Leiterin heit chönne läse. Drzue hets au immer interessanti Rezäpt, Baschtu- und Dekorationsaleitige gä. Die verschiednige Törli chöit der uf der Instagramsiite vor Jubla Wäuscherohr go nocheluege oder dir finget aui Törli au im "Social Feed" uf dere Homepage.

Mir hoffe sehr, dass mer im nöie Johr Jubla-Aktivitäte dörfe dürefüehre.